DENR-7 Miila sa SEDC sa Responsible Mining
Gihatag sa kagamhanan sa SEDC ang maong award “agi og pag-ila sa pagpakita ug pagpasundayag sa kabag-ohan, pagkamamugnaon ug pagpamuhunan sa pagpanalipod sa kalikupan, pagkonserba ug pagdumala.”
Misulat si DENR–7 OIC director Emma E. Melana kang Hiroyiko Sakakibara, chief technical adviser sa SEDC, harun pahibaw-on sa hukom sa mga hurado sa DENRawards committee.
Gidawat ni Dennis B. Tenefrancia, pangulo sa SEDC, ang pasigarbo gikan ni Melana atol sa ika-3 nga pagpahigayon sa Gawad Tugas sa DENR–7 ni’ng bag-o pa lang didto sa Marcelo B. Fernan Press Center sa Sudlon, Lahug, Cebu City.
Uban sa 14 nga mga awardee nga giila sab tungod sa pagseguro ang limpyong hangin ug tubig, biodiversity conservation, ug uban pa, gipasiugda ang kalihukan agi og pagsaulog sa 2017 Philippine Environment Month nga mibandera sa temang, “Connecting People to Nature.”
Sa iyang mensahe atol sa programa, mipahayag si Tenefrancia nga ang pag-ila “mihimug-at sa mga paningkamot, disipina, pasalig nga magmasmaayo pa, paglahutay ug sakripisyo nga gibuhat nato harun matuman ang atong malungtarong mga saad.”
“Makahuluganon kaayo tinuod ang responsibleng pagmina nga dili angay ipahulay. Nag-atubang ta’g mga hagit sa ating inadlaw nga kalihukan. Mao sab ang kalibutan,” siya nagkanayon.
“Apan kami sa SEDC nagatuo nga pagpamatigayon dili usa ka mapuslanong paningkaamot. Tumong nato ang ekonomikaahong kalambuan nga kinahanglang ipahigayon nga nagka-uyon sa kinaiyahan ug katilingban,” siya mipadayag.
“Dili kita maghinakug nga molantaw lang sa atong gipanginahanglan karon, apan tan-awon sab nato kung unsa’y atong ikabilin sa mga umaabot pa’ng mga henerasyon,” siya midugang.
Miuban silang Mitzie Almira I. Carin, tagduma sa human resources and administration division sa SEDC manager ug sa community relations officer nga si Gines T. Boltron sa ilang pangulo sa pagdawat sa maong parangal.
Mitunol sab sa maong pag-ila sila si DENR–7 assistant director Trinidad B. Etulle, Mines and Geosciences Bureau (MGB-7) director Eng’r. Loreto B. Alburo, ug Environmental Management Bureau (EMB-7) director Eng’r. William P. Cunado.
About ctepr
CTE Public Relations 